مسعود بارزانی

ڕۆژی یەکشەممە 3ـی ئابی 2025 لە سەلاحەددین سەرۆك مەسعود بارزانی پێشوازی لە بەڕێز تۆماسۆ سانسۆنی كونسوڵی گشتیی ئیتاڵیا لە هەولێر كرد.

لە دیدارەکەدا سەرۆک بارزانی ئاماژەی بەوەدا کە هەرێمی کوردستان بە بایەخەوە لە پەیوەندییەکانی لەگەڵ ئیتاڵیا دەڕوانێت و هەمیشە ڕۆڵی حکومەت و گەلی ئیتاڵیا بەرامبەر هەرێمی کوردستان بەرز دەنرخێنێت، هەروەها سەرۆک بارزانی ئاماژەی بە رۆل و پشتیوانیی ئیتاڵیا دا بۆ هەرێمی کوردستان لە شەری دژی تیرۆرستانی داعش و ئاماژەی بەوەدا کە هەرێمی کوردستان پشتیوانییەکانی ئیتاڵیا بۆ هەرێمی کوردستان لەبیرناکات.

لای خۆیەوە کونسوڵی گشتیی ئیتاڵیا جەختی کردەوە لە پشتیوانیەکانی حکومەت و گەلی ئیتاڵیا بۆ هەرێمی کوردستان و پەرەپێدانی پەیوەندییەکانی نێوان هەرێمی کوردستان و ئیتاڵیا لە بوارە جیا جیاکاندا.

هەر لە دیدارەكەدا بیروڕا لەبارەی دوایین پێشهات و ئالنگارییەکان و بارودۆخی سیاسی و گۆڕانكارییەكان لەسەر ئاستی ناوچەكە و عێراق و پەیوەندییەکانی حکومەتی هەرێمی کوردستان و حکومەتی عێراق و پرۆسەی ئاشتی لە تورکیا و ئاڵۆزییەکانی سوریا ئاڵوگۆرکران هەروەها جەخت لە پەرەپێدانی پەیوەندیی دۆستانەی نێوان گەلی کوردستان و گەلی ئیتاڵیا كرایەوە.