مسعود بارزانی

ڕۆژی چوارشەممە 28ـی 8ـی 2019 لە سەلاحەددین سەرۆك مەسعود بارزانی لەگەڵ ڕێواس فایق سەرۆكی پارلەمان و هێمن هەورامی جێگری سەرۆكی پارلەمان و مۆنا قەهوەچی سكرتێری پارلەمانی كوردستان كۆبۆوە.

لە كۆبوونەوەكەدا بارودۆخی سیاسیی و دوایین گۆڕان و پێشهاتەكان لەسەر ئاستی كوردستان و عێراق و ناوچەكە تاوتوێ كرا.

هەر لەو كۆبوونەوەیەدا سەرۆك بارزانی وێڕای پیرۆزباییكردن لە دەستبەكاربوونی سەرۆكی پارلەمان و دەستەی سەرۆكایەتیی پارلەمان هیوای سەركەوتنی بۆ خواستن و پشتیوانیی تەواوی خۆی بۆ دەستەی سەرۆكایەتیی تازەی پارلەمان لە چاودێریكردنی كاروباری حكوومەت دووپات كردەوە و ئەوەیشی خستە ڕوو كە پێویستە پارلەمانی تازە كار بۆ بەردەوامی و پتەوكردنی بنەماكانی پێكەوەژیانی ئایینی و نەتەوەیی و دەستەبەركردنی یەكڕیزیی نیشتیمانی لە هەرێمی كوردستان بكات و پڕۆسەی چاكسازی و هەروەها ئامادەكاری بۆ نووسینەوەی دەستوورێكی هاوچەرخ بۆ هەرێمی كوردستان بكاتە ئەولەویەتی كارەكانی خۆی.

لە درێژەی كۆبوونەوەكەدا سەرۆك بارزانی ڕۆشنایی خستە سەر پڕەنسیپی هاوكاری و هەماهەنگیی نێوان دەستەڵاتەكان ئەویش لەپێناو خزمەتكردنی زیاتری خەڵك و بەهێزكردنی دامودەزگەكانی هەرێمی كوردستان. سەرۆك بارزانی هێمایشی بە بایەخ و گرنگیی دامەزراوەی پارلەمان دا و جەختی لەوە كردەوە كە دەستەی سەرۆكایەتی موڵكی هیچ حزب و لایەنێك نیە بەڵكو موڵكی گەلی كوردستانە.