Mesûd Barzanî

Roja Sêşemiyê 18ê Mijdara 2025an li bajarê Dihokê Serok Mesûd Barzanî bi birêz Mihemed Şiya Sûdanî Serokwezîrê Federalî yê Iraqê re civiya.

Di civînê de her du aliyan pîrozbahiyê li hev kirin bi boneya serkeftina pêvajoya hilbijartinên Encûmena Nûneran a Iraqê ku di rewşeke aram û bê pirsgirêk de pêk hat. Her du aliyan hêvî kirin ku encamên hilbijartinan di xizmeta berjewendiyên gelê Iraqê de bin.

Di beşeke din a civînê de bal kişandin li ser qanûna hilbijartinan û hat destnîşan kirin ku ji bo dadperweriyeke zêdetir pêdivî bi guhertinê heye.

Her di civînê de rewşa siyasî ya Iraq û herêmê, pêşhat û guhertinên siyasî yên di nava pêvajoya siyasî ya Iraqê de hatin gotûbêjkirin.

Hêjayî gotinê ye ku di wê hevdîtinê de her yek ji Fuad Husên endamê Mekteba Siyasî ya Partî, Beha El-Eracî, Ehmed El-Esedî û Qusey Mehbûbe endamên Hevpeymaniya Avakirin û Pêşxistinê di civînê de amade bûn.