Mesûd Barzanî

Roja Pêncşemiyê, 6ê Çiriya Paşiyê ya 2025an li Pîrmamê, Serok Mesûd Barzanî li gel berpirs û kadroyên Şaxa Şeşemîn a Ewropayê ya Partiya Demokrat a Kurdistanê (PDK) civiya.

Di destpêka civînê de, Serok Barzanî piştî ku bixêrhatina wan kir, kêfxweşiya xwe ji bo vegera wan û piştgiriya wan bo serkeftina Lîsta 275 a Partiya Demokrat a Kurdistanê anî ziman. Di vê çarçoveyê de, Serok Barzanî behsa rola û ked û xebata Kurdên derveyê welat kir ku her dem di serxistina mijarên neteweyî û niştimanî de roleke berçav girtine û têkoşiyane, û hêviya serkeftinê ji wan re xwest.

Serok Barzanî li ser proseya siyasî ya Iraq û herêmê û Herêma Kurdistanê û hilbijartinên pêşerojê yên Encumena Nûneran a Iraqê kurteyek ji amadebûyan re pêşkêş kir û behsa bingehên Destûra Daîmî ya Iraqê û nepejirandina bendên Destûrê kir ku bûn sedema derketina bi dehan pirsgirêk û astengiyan di navbera Hewlêr û Bexdayê de. Herwiha Serok Barzanî tekez kir ku bicikirina bendên Destûra Iraqê sedema sereke ya aramî, avadanî û hevjiyanê ye.

Di beşeke din a axaftina xwe de, Serok Barzanî kurteyek li ser zilm û tawanên rêjimên li pey hev yên Iraqê yên li hember gelê Kurdistanê pêşkêş kir û ragihand ku piştî ew qas zilm, zordarî û wêraniya ku bi ser gelê Kurdistanê de hat, niha jî Herêma Kurdistanê xwedî qewareyeke siyasî ye û di vê çarçoveyê de tevî hebûna astengî û rêgiriyên berdewam, Herêma Kurdistanê di hewleke dijwar de ye ji bo pêşxistina û avakirina bajar û bajarokên xwe bê cudahî û gelek projeyên mezin hatine cîbicîkirin û piraniya van projeyan bi destên xwemalî hatine pêkanîn. Herwiha Serok Barzanî ji amadebûyan re ragihand ku çawa di paşerojê de wek Pêşmerge têkoşiyan, niha jî li dijî wan hewlan berdewam bin ku ji bo gel, hikûmet û Herêma Kurdistanê bi giştî tên çêkirin. Serok Barzanî herwiha destnîşan kir ku dijmin bi planên curbecur hewl didin vê ezmûna Herêma Kurdistanê têk bibin, bi taybetî bi riya belavkirina madeyên hişbir di nav civakê de.

Herwiha Serok Barzanî ji amadebûyan re got ku pêwîst e em hemû pişta xwe bi xwe ve girêdin û çavê me li destê kesî nebe. Di dîrokê de eşkere ye ku dema Kurdistan ketibe rewşeke metirsîdar û rastî êrişên neyaran hatiye, tenê Pêşmerge bûye parêzvanê ax û rûmeta Kurdistanîyan.

Di dawiya axaftina xwe de, Serok Barzanî ragihand ku em pişta xwe bi Xwedê û gelê xwe ve girêdane, lewra di tu rewşê de û di bin ti zextê de em ê tawîzê li ser mafên rewa yên gelê xwe nedin.