Mesûd Barzanî

Roja Yekşem a, 16ê Mijdara 2025an, li Pîrmamê, Serok Mesûd Barzanî pêşwaziya birêz Lee Jeong-il, Balyozê Koreya Başûr li Iraqê, kir.

Di hevdîtinê de, ku birêz Sunghol Lim, Konsulê Giştî yê Koreya Başûr li Hewlêrê jî amade bû, Balyozê Koreya Başûr pîrozbahiyê li Serok Barzanî kir ji bo serkeftina mezin a Partiyê di hilbijartinên Encumena Nûneran a Iraqê de. Herwiha pesnê wan pêşketin û guhertinên ku di salên borî de di bin sîbera ewlehî û planên rêkûpêk de li Herêma Kurdistanê pêkhatine, da. Her wiha diyar kir ku têkiliyên welatê wî bi gelê Kurdistanê re di dema hebûna tîma Zeytun li Hewlêrê de hatine avakirin û niha di warên veberhênan, teknolojî û warên din de gelekî pêşketine û hêvî kir ku ev têkilî zêdetir berfireh bibin.

Di heman hevdîtinê de, Serok Barzanî ligel bi xêr hatina şanda mêvan, tekezî li ser dostanî û têkiliyên di navbera gelê Kurdistanê û gelê Koreya Başûr de kir. Herwiha destnîşan kir ku gelê Kurdistanê li hemberî welat û gelê Koreya Başûr xwedî nêrînek pir erênî ne. Di beşeke din a vê hevdîtinê de, ronahî xistin ser dîroka têkoşîn û berxwedana gelê Kurdistanê û Serok Barzanî dubare kir ku her gelekî xwedî îrade be, di dawiyê de ser dikeve û pêş dikeve.

Pêvajoya siyasî ya Iraqê û gavên piştî hilbijartinên Encumena Nûneran a Iraqê, herwiha metirsiya gefên terorê li ser ewlehiya herêmê, mijarên din ên hevdîtinê bûn.