Mesûd Barzanî

Roja Sêşemê, 25ê Mijdara 2025an, Serok Barzanî li Pîrmamê pêşwaziya şandeke Amerîkî bi serokayetiya birêz Joshua Harris, Berpirsê Karûbarên Balyozxaneya Amerîkî li Bexdayê, kir.
Di hevdîtinê de, ku xatûna Gwendolyn Greene, Konsula Giştî ya Amerîkî li Hewlêrê jî amade bû, Berpirsê Karûbarê Balyozxaneya Amerîkî li Bexdayê serkeftina pêvajoya hilbijartinên Encûmena Nûneran a Iraqê li Serok Barzanî pîroz kir û spasiya hewldanên Serok Barzanî ji bo serxistina pêvajoya hilbijartinê kir. Herwiha, behsa pengavên piştî hilbijartinan yên aliyên siyasî yên Iraqî ji bo pêkanîna kabîneya nû ya Hikûmeta Federal a Iraqê û peywendiyên di navbera Hikûmeta Herêma Kurdistanê û Hikûmeta Federal a Iraqê de kir.
Ji aliyê xwe ve, Serok Barzanî bi xêr hatina şanda mêvan kir û bal kişande li ser qonaxa piştî hilbijartinan li Iraqê û pêkanîna kabîneya nû ku rengvedana daxwazên tevahiya gelê Iraqê nîşan bide û li ser bingeha destûrê be.
Di derbarê Herêma Kurdistanê de, Serok Barzanî tekez li ser berdewamiya gotûbêjan, ji bo pêkanîna kabîneya nû ya Hikûmeta Herêma Kurdistanê ya di navbera hemû aliyên Kurdistanî de kir.
Di beşeke din a vê hevdîtinê de, guhertin û kêşeyên herêmê bi giştî hatin gotûbêjkirin. Herdu alî li ser pêşxistin û berdewamiya peywendiyên di navbera Amerîka û Herêma Kurdistanê û Iraqê de hemfikir bûn.