Mesûd Barzanî

Roja Yekşem a, 16ê Mijdara 2025an, li Pîrmamê, Serok Mesûd Barzanî pêşwaziya birêz Ziad Al-Battarseh, Konsulê Giştî yê nû yê Şahnişîniya Urdunê, kir ku bi mebesta xwe nasandinê serdana Serok Barzanî kiribû.

Di hevdîtinê de, Konsulê nû yê Şahnişîniya Urdunê silav û rêzên taybetî yên Şah Abdullah, Şahê Urdunê, gihandin Serok Barzanî û herwiha dubare kir ku ferman û şîretên Şahê Urdunê her dem ew bûye ku têkilî û dostaniya di navbera Şahnişîniya Urdunê û Herêma Kurdistanê de xurttir û berfirehtir bibe. Konsulê Giştî yê Şahnişîniya Urdunê pîrozbahiyê li Serok Barzanî kir ji bo serkeftina Partiyê û bi destxistina zêdetirî mîlyonek deng weke delîlekî zelal li ser cihê Partiyê di nav gelê Kurdistanê de û pêşketin û avedaniya ku di bin sîbera Partiyê de pêk hatiye, binav kir.

Di heman hevdîtinê de, Serok Barzanî spasiya Şah Abdullah û gelê Şahnişîniya Urdunê kir ku di rojên teng de piştgirê gelê Kurdistanê bûne û Şah Abdullah wek bira û dostekî hêja binav kir. Herwiha tekezî li ser kûrkirina têkilî û dostaniya di navbera Herêma Kurdistanê û Şahnişîniya Urdunê de kir.

Pêvajoya siyasî ya Iraqê piştî hilbijartinan û rewşa siyasî ya navxweyî ya Herêmê mijarên din ên vê hevdîtinê bûn.