مسعود بارزانی
ماڵپەڕی فەرمی
ماڵپەڕی فەرمی
سێشەممە 20 کانونی یەکەم 2022
سەرۆک بارزانی پێشوازی لە کونسوڵی گشتیی ئەڵمانیا لە هەولێر دەکات
ڕۆژی سێسەممە 20ی کانوونی یەکەمی 2022 لە سەلاحەددین سەرۆک مسعود بارزانی پێشوازی لە بەڕێز کلاوس شترایشەر کونسوڵی گشتیی ئەڵمانیا لە هەولێر کرد.
لە دیدارەکەدا بیروڕا لەبارەی بارودۆخی سیاسیی ناوچەکە بە گشتی و عێراق بە تایبەتی ئاڵوگۆڕ کران، و ڕۆشنایی خرایە سەر پەیوەندییەکانی نێوان هەرێم و بەغدا و بەرنامەی کاری حکومەتی تازەی عێراق.
هەر لەو دیدارەدا جەخت لە جێبەجێکردنی ڕێککەوتننامەی نێوان حکوومەتی فیدڕاڵی عێراق و حکوومەتی هەرێمی کوردستان لەبارەی شنگال کرایەوە. ئەویش بۆ گەڕاندنەوەی سەقامگیی بۆ دەڤەری شنگال و کۆتاییهاتنی بارودۆخی ئاوارەیی خەڵکی شنگال و گەڕانەوەیات بۆ زێدی باب و باپیرانیان.
هەڕەشەکانی تیرۆر تەوەرێکی تری ئەو کۆبوونەوەیە بوو و، کونسوڵی ئەڵمانیا لە هەولێر ئەوەی دووپاتکردەوە کە وڵاتەکەی لە شەڕی تیرۆردا بە هاوبەش و پشتیوانی هەرێمی کوردستان و عێراق دەمێنێتەوە، و سەقامگیری و پێشکەوتنی هەرێمی کوردستان بەلای ئەلمانیاوە بایەخی تایبەتی هەیە.
هەر لەو دیدارەدا سەرۆک بارزانی سوپاسی حکومەت و گەلی ئەڵمانیای کرد کە لە شەڕی دژی تیرۆردا یارمەتی گەلی کوردستانیان داوە، و پەیوەندییەکانی نێوان گەلی کوردستان و گەلی ئەڵمانیای بە مێژوویی و دۆستانە وەسف کرد.
