مسعود بارزانی

ڕۆژی پێنجشەممە 7ـی 3ـی 2019 لە سەلاحەددین سەرۆك مەسعود بارزانی پێشوازی لە شاندێكی حكوومەتی شانشینی ئۆردۆن كرد كە پێكهاتبوو لە د. تارق ئەلحموری وەزیری پیشەسازی و بازرگانی و مەنتەسەر عەقلە باڵیۆزی ئۆردۆن لە عێراق و هەیسەم ئەبولفول كونسوڵی شانشینی ئۆردۆن لە هەولێر و ژمارەیەك ڕاوێژكاری باڵیۆزخانەی ئۆردۆن لە عێراق.

لە دیدارەكەدا وەزیری پیشەسازی و بازرگانیی ئۆردۆن سڵاوی شا عەبدوڵڵا پادشای ئۆردۆنی بە سەرۆك بارزانی گەیاند و وێڕای ئاماژەدان بە پەیوەندییە مێژوویەكانی نێوان هەردوولا جەختی لە پەرەپێدانی پەیوەندییەكانی نێوان هەرێمی كوردستان و شانشینی ئۆردۆن كردەوە. هەروەها پێزانینیشی هەبوو بۆ ئەو سەقامگیری و پێكەوەژیانەی لە كوردستاندا هەیە و بە هۆكاری پێشكەوتن و ئاییندەیەكی باشی لە قەڵەم دا.

لای خۆیەوە سەرۆك بارزانی سوپاسی پادشای ئۆردۆنی كرد و بە دۆست و برای خۆی زانی و هەروەها پێزانینی هەبوو بۆ هەڵوێستەكانی پادشای ئۆردۆن لە بەرانبەر گەلی كوردستان.

هەر لەو كۆبوونەوەیەدا بارودۆخی سیاسیی عێراق و هەرێمی كوردستان و ڕووبەڕووبوونەوەی هزری توندڕۆیی و تیرۆر تاوتوێ كرا.

پەرەپێدانی پەیوەندییەكانی نێوان هەرێمی كوردستان و شانشینی ئۆردۆن تەوەرێكی دیكەی ئەو دیدارە بوو.