مسعود بارزانی
ماڵپەڕی فەرمی
ماڵپەڕی فەرمی
دووشەممە 15 شوبات 2021
بە ئامادەبوونی سەرۆک بارزانی مەڕاسیمی پێشوازی لە تەرمی خوالێخۆشبوو دکتۆر ڕۆژ نوری شاوەیس بەڕێوەچوو
ئەمرۆ دووشەممە ١٥ـی شوباتی ٢٠٢١ لە سەلاحەددین بە ئامادەبوونی سەرۆک مەسعود بارزانی لە مەکتەبی سیاسی پارتی دیموکراتی کوردستان مەراسیمی پێشوازی لە تەرمی خوالێخۆشبوو دکتۆر ڕۆژ نووری شاوەیس بەڕێوەچوو ، ھەر لە مەڕاسیمەکەدا سەرۆک بارزانی تاجە گوڵینەی ڕێزلێنان و وەفای لەسەر تەرمی خوالێخشبوو دکتۆر ڕۆژ نووری شاوەیس دانا ، لە مەراسیمەکەدا کە بە ئامادەبوونی ئەندامانی مەکتەبی سیاسی و ئەندامانی سەرکردایەتی پارتی دیموکراتی کوردستان و بەرپرسانی حزبی و حکومی بەڕێوەچوو ، سەرۆک بارزانی وتارێکی پێشکەشکرد.
ئەمەش دەقی وتاری سەرۆک بارزانییە لە مەراسیمی پێشوازی لە تەرمی خوالێخۆشبوو دکتۆر ڕۆژ نووری شاوەیس:
بەناوی خودای گەورە و میھرەبان
ڕۆژێکی زۆر زۆر خەمناکە بۆمن ، وە بۆ ھەموو ھەڤاڵانی کاک ڕۆژ، لە دەستدانی برایەک و ھەڤاڵێکی عەزیزی وەکو کاک ڕۆژ ئاسان نییە، لە ساڵی ١٩٥٨ ەوە من و کاک ڕۆژ وەکو دووبرا بەیەکەوە بووین لە قوتابخانەوە تا ئەمرۆ، بۆ یەک لەحزەش لێک دورنەکەوتینەوە ، جێگە پەنجەی کاک ڕۆژ لە ھەموو قۆناغە سەختەکانی خەباتی گەلەکەماندا دیارە ، ڕۆلەیەکی ئازاو بەوەفا بوو بۆ گەلی خۆی و بۆ پارتەکەی ، درێژە پێدەری ڕێگەی باوکی و دایکی بوو ، من دڵنیام کە ھەڤاڵانی کاک ڕۆژ درێژە پێدەری ئەو رێبازە دەبن ، وە خەبات دەکەن لە پێناو ئەو ئامانجەی کە کاکە رۆژ و ھەزارەھا تێکۆشەرو قارەمانی تر سەریان لە پێناوی داناوە، کاکە ڕۆژ ھەمیشە لە یادمە.
